وين المسؤولين من النصب في الايجارات

[عذايب قطر]

السلام عليكم ورحمة الله وبركاته
حبيت اكتب عن النصب في الايجارات واستغلال بشكل خاص المواطنين والمقيمين

انا وزوجي اجرنا شقة واللي مسؤول عن الشقق هو من جنسيات الدول العربية
اول شي الشقة مو في عماره لا هو نظام فيلا والنصب انه ندفع الكهرباء والماء مو المقيمين يدفعون لا القطريين بعد
في مخالفات كثيره مثل انهم مركبين عدادات على كل شقة عشان ياكلون فلوسنا خاصه اذا عرفوا انه اللي بأجر الشقة قطري
لا وغير انه بلغناهم انه بنطلع من الشقة نهاية شهر ابريل عشان يدورون مؤجر جديد للشقة بس هم لا حياتهم كلها نصب فقالوا لازم تدفعون شهر مايو واحنا مو في الشقة
يعني ندفع 7000 ريال واحنا مب ساكنين الشقة يعني نصب عينك عينك
كلمناهم بالطيب مافي فاي\ه كلمانهم باسلوب التهديد عشان لايجسبونا ساكتين مشى معاهم
مستغلين القطري وايد لدرجه انه قلنالهم انه بنبلغ الشرطو او النيابه ردوا علينا حتى لو اتوصلون الموضوع للامير ماراح نعطيكم الشيكات إلا اذا دفعنا
موضوع الشيكات موضوع يعاني منها الكثير
لين متى يالمسؤولين هالاشكال من النصابين يستغلون المواطن

ارجو من وطني الحبيب صباح الخير مناقشة هالمواضيع واتخاذ الاجراء المناسب
اتنظر الرد

تحياتي لكم
عذايب قطر

[هدوء الليل]

صح لسانج عذايب قطر ،، واللي نعيش فيه حالة لابد من وجود لها حلول مناسبة ترضي الطرفين ( المؤجر والمستأجر ) ولا حول ولا قوة إلا بالله العلي العظيم

[كرباج]

أختي/ عذايب قطر

أولاً: مرحبايكِ ضمن هذه العائلة

ثانياً: أنا قد تعرضت لمثل هذه الموضوع

قمت بتقديم بلاغ لدى مركز شرطة الريان كونها من اختصاص نطاق مكان الشقة

فقاموا بإحضار صاحب المكتب ..ليس العربي الموظف... بل القطري صاحب المكتب

حيث تفاجئ بالامر الذي قام به الموظف في استغلال المستأجرين


والحمد لله ... استلمنا الشيكات..

بس بعد طلوع الروح



:: وقفه ::

فيه عقد يتم بين الطرفين .. وهذه العقد ملزم لكلا الطرفين

بالتوقيع عليه .. يعتبر كلا الطرفين موافقين على جميع الشروط

فمثلاً لو قمت بتسليم شيكاتي .. وبعد شهرين قررت الخروج من الشقة ..

حسب العقد ادفع باقي المده ... وهذه المصيبة في الامر

بس من الحق المؤجر ..

لانه عند طلبه لنا بالخروج .. طبعاً سوف نقول له لا... لأنه بيننا عقد موضح الشروط ..

وكذا نصير متساوين في العقد


والعلم عند الله

[اللورد]

ان شاء الله


يتم

حل موضوعج

ويتم عمل

مراقبه علي المؤجرين

يسلمووو خيتوووو عالطرح وماقصرت

[عذايب قطر]

تسلمون ع الرد

اخوي ابوعلي مشكور ع الرد
بس تدري احنا اتصلنا في الشرطه في الريان وسالني عن المشكله وقتله كل شي بس هو الله يهديه كأنه كان يبي يسمه بس عقب قالي هذه مو من اختصاصنا من اختصاص النيابه او المحكمة

مثل ماقلت اخوي مالك العقار هو قطري بس اللي مسؤول عن الشقق هو من جنسية عربية يعني لاعب لعبته والله امس ههدناهم وخافوا بس بعد بيدفعونا ايجار شهر مايو بس مو كله نصفه
حسبي الله ونعم الوكيل

مادري اروح قسم الشرطة وله لا ممكن اتشور علينا لو تكرمت

تحيااتي لكم
عذايب قطر

[كرباج]

أختي

العقد متى تنتهي مدته

[عذايب قطر]

العقد لمدة سنتين
بس عادي نقدر نطلع من الشقه
والله ابوي عنده بيت اجار والمؤجر طلع من الشقة نهاية شهر مارس وله خذه منه اجار شهر ابريل مثل حالتنا عنده عقد اجار يبس كيفه يبي يطلع

المشكله يا خوي مايخافون لدرجه قالنا وصلوا الموضوع للامير مايهمناش
لا وهو اصلا يبون الشقة لهم لانه احنا معدلين فيها وصابغين خبرك عرسان جداد

عقب التهديد قالو ادفعو 5000 ريال وبنعطيكم الشيكات اما شيك التامين لما قلناله عنه قعد يضحك قصده في المشمش بس ماراح انخليه النصاب
احنا مانبي ندفع بس لو رحنا النيابه راح يطول الموضوع عرفت قصدي
فشو الاجراء المناسب في هالحاله

[كرباج]

أولاً: ألف مبروك ...


ثانياً: العقد سنيتن ... طبعاً ما ادري كم راح من المده

المهم :: بالنسبة لشيك التأمين .. غصب عنه تستلمونه بعد دفع فاتورة (كهرماء وكيوتل) وإحضار كتاب منهم بالإخلاء وذلك بعد الدفع وقطع الخطوط


أما بالنسبة : لباقي الشيكات يقدر يدفعكم أكثر من اللي طالبه عليكم اللحين

فالاحسن تدفعون ... وتفتكون من عوار الراس ...


والأمر متروك لكم

[عذايب قطر]

الله يبارك فيك
صارلنا ثلاث شهور لنهايه هالشهر

فمثل ماقلت اخوي ندفع ال 5000 وناخذ شيكاتنا احسن
اما التلفون احنا مركبين الخط وقطعناه امس
يعني لازم ندفع الكهربا والماي وال 5000 ونفتك من عوار الراس


تسملم اخوي والله يعطيك العافية
تحيـــــاتي لكم

[كرباج]

تسلم اخوي والله يعطيك العافية


الله يعافيك

:)

[عذايب قطر]

يعني هذا رايك
انه مانكبر الموضوع وندفع