الدراسه عن بعد

[الأستاذه]

السلام عليكم ورحمة الله وبركاته

كيفكم يااعضاء منتداي الحبيب؟؟
حابه استفسر منكم اذا فيه حد عنده خبر عن الدراسه عن بعد ..
اللي هي تكون عن طريق النت .. بدون مايحتاج الطالب زياره الجامعه ..
انا بحثت وحصلت كذا جامعه لكن المشكله ان اغلب الجامعات اللي تتيح فرصة الدراسه عن بعد تقتصر على دراسه البكالوريوس ..واذا كان فيه ماجستير يكون في اداره الاعمال او اقسام مشابهه.
لكن انا حابه اذا حد منكم عنده خبر ان به جامعه تتيح الدراسه الماجستير عن بعد في أحد المجالات التاليه :
الفيزياء النوويه ( نظريه )..
أو .. فيزياء الجوامد ..
أو .. الأطياف الذريه والجزيئية ..
ياليت اذا حد عنده اي معلومه يمدني بها .. لاني حابه اكمل والحمد لله مستوفيه كل الشروط من توصيات وسجل اكاديمي ومرتبه وتقدير .. لكن الجامعه اللي في منطقتي مافتحوا بها مجال الدراسات العليا حتى الان..
وصعب علي اروح كل يوم او يومين منطقه ثانيه عشان محاضرة ساعتين وارجع الظهران ..
فياليت اللي يكون عنده خبر يزودني بارقام او مواقع هالجامعات ..
ومومهم الرسوم الدراسيه ولا موقع الجامعه سواء بالخليج او دول عربيه اخرى اهم شي انها يكون معترف بها من قبل مجالس التعليم العالي ومايحتاج ازور الجامعه كل شوي ..

[أميرة الحزن]

عساااج ع القوة

والله ما عندي خبرة

[الجوزاء]

وانا كمان ماعندي خبررر !

[صمت]

مرحبـاا حبيبتي الاستــاذه .شدني عنوانج لاني انا نفس ..
ولي خبره فهالجامعه .,,

عندج جامعه (UST)
اللى هي University of Science and Technology
( جامعه العلوم والتكـنلوجـــيـا )

فرعها الاساسي فاليـمن .. لها عده فرووع .. في دول مجلس التعاون (عدا قطر ., سكرو الفرع اللى فيها ) بالاضافه الى مصـر والاردن والعراق ..
معترف فيــها دوليــاً .. والحلو اللى فيهاا انج حتى لو درستي عن بعد فالشهاده ..يكتب لج ان انتى دارسه فالدوله نفسهاا يعني مايذكر لج انج درستي عن بعد ..,

انا عـن نفسي سجلت فيهاا شريعه وقانون ..واختـي متخرجه منها تخصص ( علم نفس ) حاصله ع الباكلريوس والماجستير .,

والكتب توصلج ليـن عندج عن طريق الفرع ., اما بالنسبه للدفع والمبالغ .. عندي الاوارق حق سنه 2008 و2009
بشوف لج اوراق 2010 و2011 وبرد لج خبر انشالله اذا لقيتهم ..~

اذا حابه موقعهم ..كاهو

http://www.ust.edu/ar/

وانا اتمنى تاخذين أرقامهم من الموقع نفسه ..لان قبل كان عندي رقم الفرع اللى فالدوحه ..، بس للاسف سكروه عشان جي بضطر ان امتحاناتي اروح اقدمها فالامارات .. .,

بس بما ان عندكم فالسعوديه فروع .. فأمتحاناتج بتكون قريبه منج ..,

وأي سؤال ياقلبي مايردج الا لسـانج ..,

[الأستاذه]

شاكره لكم كلكم..
صمت يعطيك الف عافيه والله ماقصرتي.. اشكرك من كل قلبي

[صمت]

لا شكـر على وااجب فديت روحج .,

[دنيا غريبه]

موفق بإذن الله ... لك مني أجمل تحية ...!!

[الصاروخ الاحمر]

السلام عليكم ورحمة الله وبركاته

ودنا نساعد على الاجابه ولكن للاسف ماعندي شي للعلم على النت بس سمعت عن هالموضوع الله يوفقك ومن طلب العلم سهر الليالي . واطلبوا العلم ولو في الصين . ابحثي اختي ولا تجعلي الياس يداهمك. وانا من جهتي راح ابحث لك انشالله ولا هنتي .

الصاروخ الاحمـــ17ــــــــر.

[الأستاذه]

دنيا غريبه ,, الصاروخ الاحمر
يعطيكم الف عافيه ماقصرتوا

[‏سيـــ بن احمد ـــف]

شجا تدرسين من بعيد ماتبين استاذ يعني

تعيبيني اشيخه

[الأستاذه]

هههههههههه ياسيف عن بعد يعني عن طريق الانترنت .. مااروح الا وقت الاختبار وممكن حتى اختباراتي تكون ع النت ..
انا الان اخذ دورات مع جامعه الملك فهد للبترول والمعادن بهالطريقه وحتى الاختبارات والهوم وورك كله عن طريق النت لا ونشوف الاستاذ لايف ع النت ونسمع صوته بعد ههههه يعني مايحتاج اروح لكن هالدورات تاهلني للدراسه اللي ابيها بس ماعندهم برامج دراسات عليا .. فهمت يابويه

[أبو محمد]

الله يسامحج يالأستاذة
آنا أبي أدرس إنتساب ومب حاصلي
مسكرين كل ألبواب
وإنتي تبين الدراسة عن بعد !!!
الله يوفقج
وعقبال ما نشوفج دكتورة
قولي آمين

[الأستاذه]

الله يسامحج يالأستاذة
آنا أبي أدرس إنتساب ومب حاصلي
مسكرين كل ألبواب
وإنتي تبين الدراسة عن بعد !!!
الله يوفقج
وعقبال ما نشوفج دكتورة
قولي آمين

انتساب تبي اي مرحله ؟؟
لان جامعاتنا بالسعوديه كلها بها نظام الانتساب تقريبا.. خصوصا جامعه الامام محمد بن سعود الاسلاميه في الاحساء .. انا ذكرت هذي لانها اقرب وحده لكم .. وبها خليجيين يدرسون انتساب ..
وعندك العربيه المفتوحه بالبحرين بعد اعتقد بها نظام انتساب
وكلية عفت بجده ..
وفيه جامعات بمصر تدرس بنظام الانتساب .. طبعا هذا كله للبكالوريوس
انا اللي معطلني اني ابي ادرس مااااجستير والاقسام اللي ابيها صعبه ونادره ,, حتى في جامعاتنا بالانتظام موفاتحين هالاقسام للبنات ..
ربي يوفقك يارب ومشكور ع الدعوه

[راس المال]

موفق بإذن الله ... لك مني أجمل تحية .