شسوي يااهل الخير دلوني عطوني حل

[استغفر الله العظيم]

السلام عليكم
اول شي مبارك عليكم الشهر
ثاني شي والله مب عارفه من وين ابدى موضوعي ومادري ليش بالذات اخترت هالمنتدى على العموم اتمنى يوصل صوتي لكل الجهات اللي تقدر تحل موضوعي
و اذا حد يقدر يدلني على المكان او الطريق اللي ممكن يساعدوني ويحلون مشكلتي

طبعا انا امرأه متزوجه من 4 سنوات ولله الحمد سأصبح ام بإذن الله بعد اشهر قليله وكانت حياتي العائليه مستقره ولكن بعد السنتين انقلبت حياتي الديون على زوجي صارت من كل صوب الحمدلله على كل حال ومب بس اهني المشكله للأسف زوجي انحبس بتهمة تزوير لمدة عشر شهور والله وربي يشهد علي اني ماكنت احصل الريال اللي اصرف فيه على نفسي هذي غير الديون اللي دبرناها للمحامي تخيلوا طلب 90 الف حسبي الله بس

المهم طبعا شغل زوجي وقفوه وتخيلوا حاسبوه على الايام اللي انقطع فيها عن الدوام مع انه قالهم انه مسجون بس لاحياة لمن تنادي

هاي شي ومن ناحيه ثانيه اول ماطلع زوجي كلم شؤؤن المفرج عنهم وقالوا له بنجوف السالفه ولاحياة لمن تنادي ماقاموا يردون علينا

ونسيت اقول لما كان زوجي هناك في السجن قدمت على مؤسسه خيريه وللأسف قالول لي راجعينا بعد اسبوع ويمر
الاسبوع ويقولون لي تعالي الشهر الياي ووووولين ماقالوا لي اختي قدمي مره ثانيه ملفج ضاع.....حسبي الله ونعم الوكيل

المهم مرت الايام وطلع زوجي وقلت الحمدلله بتنحل مشاكلنا لكن احس انها تعقدت اكثر واكثر وراح قدم على كذا مكان ومحد رد عليه وقدمناعلى صندوق الزكاه قالوا لنا طلب المساعده مرفوض مع اني قدمت لهم كل الاوراق اللي تدل على الدين وانه مايشتغل وقسط السياره ورقم حسابه عشان يجوفون انه رصيده صفررررر والله ياناس تعبت تعبت من كثر التفكير

خلااص مب عارفه وين اطق براسي لين متى بنتم على هالحاله وليش مايساعدونا يعني اللي يغلط ياخذ جزاته وخلاص مايصير تنقلب الدنيا عليه اذا الله يسامح ويغفر عيل البشر شنووو هذا وهو ولد البلد عيل شيسوي وين يروح واهو واره مرته وان شالله الولد اللي بيي اشلون بنأكله وشلون بيعيش والله ياناس حتى بترول سياره ماعنده والله العظيم ولاريال في جيبه ويشهد علي ربي مانقدر نرقد من كثر التفكير شنسوي ياناس عطوني حل وين انروح من منه نطلب المساعده...

حتى المؤسسات الخيريه ترفض تساعدنا لييييش حتى في رمضان شهر الخير يعني بالذمه الواحد مايبيله اكل وشرب لاحول ولاقوة الا بالله وحسبي الله ونعم الوكيل كذا مره فكرت انفصل عن زوجي لأنه مب قادر يصرف علي لكن اتعوذ من ابليس واقول في قلبي يعني معقوله تهون علي العشره واتخلى عن زوجي واوقف ضده كفايه الكل مصكرها في ويهه

خلاص انا بحاول اخفف عنه واستحمل بتقولون لي غلط طيب وشنو يعني غلط الكل يغلط وياخذ جزاته وربي يغفر له ليش كل هالقسوه ليش ياهل الخير ليش وهذا واهو ولد البلد

اسفه طولت عليكم بس تكفوون عطوني حل وين اروح شسوي

[سراااب قطر]

أول شي
ان شااء الله جزاااج عند رب العاالمين أنج وقفتي مع زووجج حتى لو أنه غلط مرد العشره تلعب دوور فالموضووع ولا تخلين عياال الحرااام يقصوون عليج ويقوولوون لج أنفصلي ترا هو محتاااجج هالفترة

وبخصوص شغله هذي أجراءات قاانونيه أن الوااحد لو دخل سجن أو غيره ينفصل أو يتووقف عن دوااامه حتى أشعاار آخر والبعض منهم طبيعي يجيله (فنشششش)

وبخصوص الصنااديق الخيريه
أنا مستغرب من كلامج أنهم ما ساعدوووج مع أنهم من المفروووض أنهم يساااعدونج في مثل هالظروووف

شووفي أختي على مايقووولوون ما باليد حيله

دام كل البيبان تسكرت بوجهج رووحي لحقوق الأنسان وعطيهم جميع الأوراق الي تقدمت لصناديق الزكاه واللجان الخيريه وشهاده تثبت أن زوجج كان مسجون وجميع الأورااق الي عندج

وأكتبي في طلبج أنج محتاااجه مسااعدتهم وصدقيني رااح يساااعدونج مابيتركووونج

وبالنسبه لزووجج هو متهم في قضية تزووير يعني قضية مب سهله وصعب أنه يشتغل في اي وزارة أو أي مؤسسه

بس يقدر يرووح شركه حماااايه ويقدم عندهم وان شااء الله بيوظفووونه

ودام هو مايقدر يتووظف ليش أنتي ماتتوظفين وتشيلين هم نفسج
حاليا موقفه جميع طلبات العمل بس بعد العيد قدمي وصدقيني مابيرفضون طلبج في الحاله الي أنتي فيها

ولاتنسين تقدمين للديوان الأميري طلب مقابله سمو الأمير مع طلب مساعده ماليه تذكرين فيها ظرووووفج
وماراح يقصروون معاااج (قدميه في الديوان الكبير مب ديوان المساعدات)

الله يفرج همج يا أختي الكريمه

وأنتي سووي الي قلت لج عليه وبأذن الله راااح تنفتح أبواااب الرزق

بس لازم ماتوقفين مكتفه يدج وتنطرين الرزق لازم أنتي تركضين ورااا الرزق وترا في وااااايد بيووت شيووخ فاتحينهم للزكااااه

ويعطون على 5000 ريال وعلى 3000 ريال
قدمي عندهم وبأذن الله رااح تمشي أمورج لين ماتخصلين الإجراءات الي قلت لج عنهم

وروحي مره ثااانيه صندوق الزكاااه وقدمي أوراااقج عند وااحد أسمه (عبدالكريم الحسيني - بوعبدالله) في اللجنه

وأشرحي له الموضووع هو مابيقصر وياااج

[الأستاذه]

ربي يفرج كربتك اختي ... وان شاء الله الحلول اللي قدمها لك الاخ احمد تفيدك ...

[البرنسيسه]

لا حول ولاقوة الا بالله الله يعينج ويفرج من همومج
بس ليش ماتقدمين على وظيفه شوفي المدارس وشوفي برج برزان قدمي عندهم هم يشوفون لج وظيفه
الله يكتب لج الرزق ان شاء الله

[بن نايفه]

انا مافهمت الوضع بشكل صحيح وسؤالي التهمة بمعنى تهمة التزوير المحكمة برئت ريلج ولا خذ ادانه

[استغفر الله العظيم]

الله لا يهينكم ويرزقكم بكل اللي تتمنونه...
اما بالنسبه لكلامك اخوي احمد فوالله اثلج صدري وحسيت انه توه في امل ممكن حد يساعدنا
والله انا بعد انصدمت من المؤسسات الخيريه انهم يقولون له مرفوض طلبك يعني وربي كانت اتينا صدمه خلها على الله بس
وبالنسبه لبيوت الشيوخ انا للأسف مادل اي بيت والا والله ماترددت وجان رحت لهم
وكنت ابي اقولك اني مااقدر اشتغل حاليا الا بعد الولاده انشالله لأني ممنوعه من الحركه لأن حملي ضعيف واي تعب راح يضر الجنين الله يثبته يااارب يااارب والا وربي كنت مستعده اشتغل اي شي وفي اي مكان
شركة الحمايه تتوقع انهم يرضون يوظفونه؟؟ الله يسمع منك يالييييت يارب يقبلونه


انشالله بخليه يروح حقوق الانسان والديوان بإذن الله

الله لايهينك وجزاك الله خير ويخليك لهلك ويرزقك كل اللي تمناه



فمان الله

[استغفر الله العظيم]

احكموا عليه سنه يعني ادانه وبعد عشر شهورمن السجن النيابه عفت عنه بموجب حسن سيره وسلوكه .....


جزاك الله خير

[عيـــــ قطــــر ـــــون]

الله يفرج همك اختي واخوي احمد قدم حلول جزاه الله خير
واخوي ابن النايفه اكيد بايده شي وان شاء الله يطلع بايده وبايد اهل الخير يارب
ومن جهه ثانيه استغرب من المؤسسات الخيريه والجمعيات وصندوق الزكاه... لو هالانسانه ما ساعدتوها بالله قولولنا مين تساعدون؟

[محتارة والله]

اختي الله يعينج ويفرج كربتج يارب ..
ماعندي اي فكره والله
وما املك الا دعوه بظهر الغيب

الله يكون بعونج حبيبتي ويفرح قلبج

[الأستاذه]

والله الجمعيات الخيريه مشوارهم طويل في كل الدول ... انا كنت متطوعه في وحده منهم واشوف بعيني محد قالي ... ومن الظلم اللي شفته للناس انسحبت وماصرت اروح الجمعيه .. ربي يعينك ويسهل امرك وان شاء الله اداره منتدانا مايقصرون معك

[استغفر الله العظيم]

اخوي بن نايفه انشالله بتواصل معاهم وبرد عليك وجزاك ربي الجنه

اختي الغاليه عيون قطر ربي يسلمج حبيبتي الله يحنن قلوب هالمؤسسات علينا ويساعدونا بدال مايقولون لنا مرفوض الطلب وماتجوز لكم المساعده يل اتجوز حق منو ابي اعرف

اختي محتاره مشكوره على الدعوه ولاتنسيني من دعاويج بالصلاه الله لايهينج

[استغفر الله العظيم]

غاليتي استاذه .....

في مؤسسه رحت لها قالو لي تعالي عقب شهر وعقب الشهر رحت قالولي لين اللحين في اللجنه عقب 6 شهور رحت قالوا لي توها في اللجنه اخر شي قالوا لي قدمي مره ثانيه لأن الطلبات كلها لغيناها اللحين نستقبل طلبات السنه الجديده بالذمه هاي ناس عندهم ضمير والله ذلوني قسم بالله تعبوني روحي وتعالي واتصلي واخر شي كنسلنا الطلبات قدمي مره ثانيه

خليها على الله بس

[الأستاذه]

معليه حبيبتي لا تيأسين .. وحاولي مره ثانيه .. بس خلك وراهم طفشيهم .. لين يملون هم مايجون الا كذا وش تسوين .. ربي يسهل امرك

[سراااب قطر]

أختي الله يثبت حملج ان شاااء الله ويفرج همج

أنتي رووحي صندوق الزكااه عند الشخص الي قلت لج عنه في المرة الاولى وان شااء الله بيسااعدج

وشركه حمااايه تشغل الي توهم طالعين من السجن عندي واااحد تووه طالع بس بقضيه ثاانيه واشتغل عندهم

وبأذن الواحد الاحد بيشتغل ريلج

وعالديواااان روووحي قدمي خلال هاليومين واذا قالوا لج فالديوااان الكبير مانقدر ناخذ اوراااقج نزلي دمعتين وبياخذونها

او اتصلي فيهم وقولي له الموضوووع وبيسااعدج هو رجال فيه الخير

بس قلت لج قبل يوم الخميس روووحي استعجلي فالموضووع

[استغفر الله العظيم]

اخوي احمد الله يسمع منك ويثبت جنيني يااارب ...


وانشالله بيروح باجر شركة الحمايه وبيجوف


اما ديوان الخدمه انا شخصيا ماقدر اروح لأني ممنوعه من الحركه نهائيا انشالله زوجي بيروح بس قبل يوم الخميس صعبه لأن محتاجين ورقة المديونيه من البنك وتدري يبلها يومين والظروف ... انشالله الاسبوع الياي بيدبر كل شي انا عندي صور من اوراق المديونيه واقساط السياره وكل الاوراق اللي قدممتهم حق صندوق الزكاه بس صور بيرضون صور بإذن الله بدبر عشان اطلع كل الاوراق المطلوبه خصوصا اوراق البنك والسياره .....


جزاك الله الف خير والله يكثر من امثالك ....

[نمران]

ان الله يسمع ويرى هذة الجمعيات تساعد الغريب وخارج الوطن ليقال ليس للأجر (الاقربون اولى بالمعووف لكي الله وانتي في بلد خيراتة ملات دار فول وعجوز قطرية تنام في المساجد من الحاجة صباح الخير ياوطن

[فجر الدوحة]

السلام عليكم ورحمة الله وبركاته اتصلي على الخط الساخن في برج برزان وزارة العمل وعلى طول بيردون عليج بعد ماتقدمين اوراقج في الدور الاول 44841902

[رووووح قطر]

الله يفرج همج ويثبت حملج اختي


ياكثر صناديقهم الجمعيات الخيريه لي موزعه في كل مكان ....سؤال الفلوس عيل وين تروح؟؟ اذا حالت الاخت مساعدوها عيل الفلوس وين تروح ؟؟؟؟ مب المفروض الشعب له نصيب فيها فلوس الزكاه وصدقات لي تنحط في صناديق لي موزعه في كل مكان حتى في الحلاق لي احلق عنده في صندوق حق قطر الخيريه

اختي كلمي احد في جريده الشرق يكتب عن حالتج وطلعي كل شي بخاطرج عن الجمعيات وعن االاتزمات البنك في ناس متدري عن حالتج لو كتبتيها في الجريده ان شاء الله بتفرج اهل قطر فيهم الخير

[استغفر الله العظيم]

رجعت لكم واشكر كل من تواصل ورد علي وكل الشكر لكم اخواني الله يجزيكم الخير على شعوركم الطيب وتعاطفكم معاي

بس حبيت اقولكم للاسف للاسف محد ساعدنا الله يسامحهم الله لايحيج حد لهم وينحط بنفس الموقف اللي احنا فيه احين ..

واللي ذابحني انه طلع لي شي ثاني .... البنك اااه ياخواني البنك بيرفع قضيه على زوجي لأنه مايسدد القرض اللي عليه شسوي من وين اييب تخيلوا صارله سنه وشي مايسدد خذوا فواايد بالهبل الله ياخذهم مايرحمون ولين احين قاعده اتزيد الفوايد شنسوي محد حاس فينا قدمنا كذا مكان لكن ماافي ماااااااااااااااااافي والله خايفه ينسجن مره ثانيه ومالي غيره ماعرف اكتب بالجريده والا شرايكم ؟؟؟ ديونه وصلت 370 الف هاي كله فووايد وربي حررام حراام
وبيتم ايزيد عاد وانتوا حسبوا حسبي الله ونعم الوكيل ......... مادري افكر اني اكلم شيخ او حد يعني يكون عارف الله ويحب يساعد بس من وين اييب ارقامهم تكفون دلوني مافي الا هالحل اللي يعرف حد يحب يساعد تكفوون ياخواني قسم بالله حالتي النفسيه زفت مب قادره مب قادره خلاص ظاقت فيني الدنيا وافكر انفصل مافي الا هالحل بس الولد اللي بيي حرام احرلامه من ابوه وبعد زوجي مافي منه ومايتععوض قسم بالله مب عارفه ياجماعه كل مااجوفه احسه مظايق وكله بروحه يفكر ومب قادره اتحمل اجوفه بهالوضع والله يصيح يصيح مب عارف اشلون بيصرف علينا ومب هاين عليه يعيشني بهالحاله وكله يفكر بالياهل اااخ يااربي تعب لاحول ولاقوة الا بالله العلي العظيم ....
تكفون ساعدوني

[الأستاذه]

ياقلبي انتي قبل ايام جيتي فبالي وكنت احسب مشكلتك انحلت لان ماشفتك عقبتي ع الموضوع . يارب يفرج همك ويسد ديونكم
انتظر اسمع اخبار حلوة منك قريب باذن الله

[استغفر الله العظيم]

الله يسلمج اختي استاذه من طيب اصلج يالغاليه وكلامج وربي ذهب يخفف عن الواحد .....

مااقول غير حسبي الله ونعم الوكيل ...

والله لايراوي حد اللي انا فيه ....

[غايب]

العين بصيرة واليد قصيرة
وهذا باب للخير مفتوح للجميع

والله في عون العبد ما دام العبد في عون اخيه
من فرج عن مؤمن كربة من كرب الدنيا فرج الله عنه كربة من كرب يوم القيامة

[استغفر الله العظيم]

مشكور اخوي غايب .....

والله يفرج كربتي وهمي بأسرع وقت وكل مهموم ان شاء الله ...

لاهنت على المرور

[الصــقر الجــارح]

لاحول ولا قوه الا باالله الله يعينج اختى انشاالله الله يفتحهاا ابويهج
خليهاا على الله ...