وووووين العدل ؟؟؟؟

[بوغزلان]

حبيت اطرح عليكم موضوع سمعته من الربع

المدارس الحكوميه والمدارس المستقله والظلم اللي صاير عيني عينك واحنا اللي متضررين بالبدايه والنهايه يعني طالب كلمني شخصياً وقالي يابوغزلان تدري انه المدارس المستقله سهلت لنا اشياء وايده قلت له مثل شنو قالي انه لما كان بالمدرسه الحكوميه كان ساقط في اربع مواد ولما نقل ملفه لمدرسه مستقله قال كل اهتمامهم ودرجات النجاح 80 % اكثر شي تعتمد على الابحاث والبروجكتات اللي يقدمها الطالب اما 20% تعتمد عالاختبارات !!!
هل هذا عدل ومنطق يعني احنا يا طلاب المدارس الحكوميه النوم عيوننا ما اتذوقه كله وندرس نحفظ وغير هذا اخر شي انلاقي نص الامتحانات من خارج المنهج !!!

والشريحه الاكثر تضرراً احنا يا طلاب المنازل والليلي المفروض لنا اكثر دراجات النجاح من الوزاره لانه كفايه نشتغل الصباح والمساء ندرس ونكافح ونقدم امتحانات غير مسؤولية الحياه !


واتمنى هالموضوع يوصل للمعنين بالموضوع ولكم جزيل الشكر

[ماسة قطر]

الله يعينك اخوي ....
ويوفقك في الامتحانات ....
أتمنى صوتك يوصل للجهات المختصة .....

[صوت الوطن]

ودرجات النجاح 80 % اكثر شي تعتمد على الابحاث والبروجكتات اللي يقدمها الطالب اما 20% تعتمد عالاختبارات !!!


هذي والله كارثه

;) ويوفقك في الامتحانات ....

[بوغزلان]

اي والله الله يعينا ويعين جميع الطلاب

[دمعه]

الصراحه يعني صج مدري كيف مستوي التعليم عندكم

في المستقله جي الطالب ماراح يدرس ولا يعتمد عالدراسه اصلن...واذا مادرس كيف راح يتعلم..

وفي الحكوميه ..بعد ما يحتاي اقول...


الله يعينكم الصراحه

................

يعطيك ربي الصحه والعافيه

[دمي عنابي]

اشكرك يابوغزلان على الموضوع الساخن

ونتمى من برنامج وطني الحبيب ووقفاتهم الميمونه أن يصلو هذه الفكره باسرع وقت

لانه مثل مقال اخوي ظلم

ونتمى من وزارة التربيه والتعليم المراعاه في التصحيح وتسهيل بقيت الاختبارات

ولا يحطونا في مأزق عند الاسئله الصعبه والمحوريه

وارجو من منتدى وبرنامج وطني الحبيب أخذ هذا الموضوع بعين الاهميه والاسراع كماتعودنا منهم



ولكم مني الشكر

[اللورد]

الصراحه اخووووي الله يكون بعونكم


والله يوفقكم

[بوغزلان]

الله يعين الجميع ومثل ما قلت دمي عنابي اتمنى انا بعد انهم يراعونا بالتصحيح يعني الطلاب النهاريين لهم درجات نشاط ودرجات سلوك اتساعدهم بالنجاح احنا وين الدرجات اللي اتساعدنا بالنجاح ؟؟

[عين أبوها]

تعبت وانا اقول ان المدارس المستقله فااااشله ..!!

صح في تفريق ملحوظ من ناحيه النجاح والرسوب.. وبصراحه دام ينجحون الطلاب فالمستقله لازم ينجحون اللي فالحكومي .. لان اشوف مستوى الحكومي افضل من المستقله ..

[وطنـــــية]

اتفق مع عين ابوها .. يا جماعه المدارس المستقله فاااااااااشله .. انا كمدرسه في وزاره التربيه والتعليم .. اتفق معا الأغلب ان المناهج التعليميه تلقينيه لكن هاي للأسف من من ؟ يا ترى تدرون إن أغلب الي ماسكين إدارات مدارس مستقله ومسووين فيها مدراء وحضاريين هم الي مسووين كتب الوزارة ؟؟ طيب لمن انتو شايفين ان كتب الوزارة تلقين ليش تسوونها ؟؟

وبعدين والله اني اعرف مدرسات من مؤسسات المستقله وأول جيل ودفعه للمدارس المستقله إنهم يحلفون لي إن النجاح إجباري يعني نجحوهم عشان ما يقولون ان المستقله افشلت " والله شاهد علي " الكلام على السان مدرسات المدارس المستقله .. شوفو مخرجات المدارس المستقله ومخرجات الحكوميه راح تلاحظون الفرق المستقله طلابهم فارغين تعليميا ليش ؟ لان كل اهتماماتهم انشطه وأبحاث ومافي منهج .. بعطيكم مثال ..

منهج الصف الثاني الإعدادي لكتاب ما في الحكومي يتكون من اربع فصول أو وحدات .. في المستقله ياخذون طلابهم فصل واحد بس من هالفصول لمده 4 شهور " كورس " وهاي غلط مب صح يا جماعه لا افراط ولا تفريط ..

يا جماعه .. لمن تجيني مدارس نسبه نجاحها 100% !! هاي مب شي صحي ولا صح اهني لازم نقول ان الموضوع فيه شي غلط .. لان الرسوب حاله صحيه لان في فروق فرديه .. وبعدين بعض المدارس ما تقبل الا طلاب بمجاميع عاليه " داشين الجامعه مو مدرسه " فلازم يكون نسبه نجاحهم عاليه .. بس الله يشهد علي على مستوى المدارس المستقله نعترف ان فيمجمع مدارس للأولاد ومدارس للبنات تدريسهم عالي وقوي .. بس هاي ما يعني الكل ناجح .. اوكي نسوي مستقله بس مو جذي ؟؟ في كم سنه سكروا مدارس الحكومه !! وكلها مستقله ؟ وين صارت ووين بتصير ؟؟ أصلا هالتصرف معناته فشل وزاره التربيه والتعليم .. احنا بس نمشي مع الموجه وتوجهات ناس ماديه للأسف مو تربويه .. والي راح يصير ان وزارة التربيه راح ترجع مو الحين بعد كم سنه راح يندمون على تعريض حياه اولادنا وبناتنا للضياع في هالدوامه التعليميه الفاشله .. بس اتمنى ما يطولون ليمن يصحون ..

مسأله المسائي والمنازل .. دايما كنت أطالب إن هالفئتين تكون كتبهم ومناهجهم مختلفة عن الصباحي لان وضعهم غير .. ولا حياة لمن تنادي ..

[بوغزلان]

صراحه يعطيج العافيه اختي وطنيه عالرد الطيب ويزاج الله خير , أهـــل مكــة ادرى بشعبهــــا الاخت وطنيه مدرسه وهي ابخص بهالامور اكثر مني واكثر من اي شخص