اقترااح ياليت الكل يشارك ويبدي رأيه فيه

[بدر المحبة]

السلام عليكم ورحمة الله وبركاته

كيف حالكم جميعا ادارة ومراقبين ومشرفين واعضاء

عندي اقتراح بسيط

بخصوص اخوانا المحالين الى البند المركزي او من هو عاطل عن العمل ويدور لقمة العيش
انا اقترح ان يكون هناك توظيف في محطات البترول كما هو معمول به في دولة الكويت الشقيقه
كل محطه يكون فيها مبنى صغير او بورت كابن لاستلام النقود ونظام المحطه اخدم نفسك بنفسك تعبي البترول ومن ثم تأتي الى الكاشير او الموظف بمعنى اصح وتدفع ثمن ماقمت بتعبئته طبعا يكون هناك عمال يقومون بخدمة السيدات لانه مش معقول السيده بتنزل وتعبي لنفسها
وبهذه الطريقه يكون هناك فرصه للقطريين العاطلين عن العمل او المحالين الى البند المركزي تكون لهم فرصه في التوظف وسد حاجتهم انا زرت الكويت واكيد اكثركم زارها
اتمنى انه وصلت الفكره لاني يمكن ماوصلتها بالمفهوم الصحيح ولكن فيكم البركه بتفهمون ما اقصده
يعني فيه ناس ماعندهم شهادات تؤهلهم للتوظيف ولكن عندهم خبره في التعامل مع الحاسب الالي الذي من خلاله يتم دفع النقود من جهه العملاء او مرتادي المحطه

ولكم جزيل الشكر

اتمنى التفاعل مع هذا الموضوع بجديه لانه مهم

[سراااب قطر]

فكره حلوووه بس يبيلها درااسه من نايحة تقبل المحطات للفكره وثانياً تقبل الشارع القطري بالنسبة لطريقة أن هو من يعبي حق نفسه البترول ,
أنا أضيف على فكرتك بأن المحطات تقوم بتوظيف المحالين للبند المركزي في وظائف مثل الأشراف على العمال الأشراف على المحطه ككل أو تعيينهم كوظيفة إدارية لأن أغلب المحالين للبند المركزي ناس لهم خبرة في أي مجال إداري
وتبقى فكرتي مجرد أضافه لك -

وأنا معاك في الفكره

[نهر الشووق]

الله يعطيك العافيه اخوي صحيح موضوع حلو لكن من وجهة نظري تقبله صعب تدري ليش؟؟؟؟؟؟؟؟؟؟؟؟؟
لأنه تعرف ربعنا وأهلنا في قطر بيقولك أشتغل في محطه مستحيييييييييييييل حتى لو مدير وجماعته وأهله
بيقولون بتفشلنا إنت إلخ إاخ إلخ.....
مع إنه سبحان الله أكيد شفت إخوانا السعوديين مثلا كل شي يشتغلون في محطه أو تاكسي أو يبيع خضره
أو أي حاجه المهم يشتغل وإحنا كل شي عندنا عيب لا والله إلا العيب البطاله ....
ودمتم بأحسن حال...

[بدر المحبة]

اشكرك اخوي احمد الانصاري وبيض الله وجهك على المداخله واضافه فكرتك
طرحي للموضوع هو مجرد اقتراح وكل واحد يقول اللي بخاطره حتى نتوصل لشئ يفيد اخواننا المحالين والعاطلين عن العمل
واكرر لك الشكر الجزيل ولاهنت وفكرتك حلوه ليش لا

[بدر المحبة]

نهر الشوق
يعطيك العافيه على المشاركه الحلوه
والعيب في ان الواحد يتسلف او يطلب من فلان وفلان
الشغل مش عيب العيب يقعد الرجل بلا شغل ولامشغله
واللي يفشل سواد الوجه هو اللي يفشل اما الشغل مايفشل ابد
الرسول صلى الله عليه وسلم رعى الاغنام وهو نبي ونبي الله نوح اشتغل نجار
يعني وين العيب في الشغله الا قول الناس زادت النعمه عليهم وماعاد يرضون بالشئ القليل
على العموم يعطيك العافيه على مشاركتك وماقصرت يالشيخ

اتمنى التفاعل من البقيه في هذا الموضوع واللي عنده رأي يبدي رأيه

[الحياء]

الله يجزااااك كل خير..


والله صدقت..العيب طلبة الناااس ..ومد اليد..والحاجه لفلان وفلنتان...



اهم شي اي شغله في لقمه حلال..ولا فيها منة احد..وياااااليت شبابنا يرضووون ..ويطردون كل الاسيويه ويشتغلون بدالهم..والله انهم حتى يشتغلون وظايف احسن منهم ومعيشين اهلهم احسن عيشه


القهر انهم يجووونا ويشتغلون ويبنون قصوور وفلل وحن نجيبهم ونسكن اجاارات وحالتنا حاله العيب منااا..والعقل والتفكير الصحيح عندهم ..


بالتوووفيق ان شاء الله لشبابنا..والله يرشدهم طريق الصواااب

[بدر المحبة]

يعطيك العافيه على المشاركه يسلموووووووووووو

ومثل ماقلت العيب طلبة الناااس ..ومد اليد..والحاجه لفلان وفلنتان...

[موزاني]

من غير تكسر مياديف ,, القطري يرفض الفكرة ,,, كل شي الا رزته ,,,
وأنا من سنة الدنيا واحنا درورسنا في المدرسة عن عزوف الشباب القطري عن العمل اليدوي
طبيعته ما يقدر يغيرها وما ألومها
لك مني كل الشكر وان شاءالله يغيرون قناعاتهم وينجح الاقتراح و يجوف النور على أرض الواقع

[بدر المحبة]

اختي موزاني اشكرج على مشاركتج الطيبه
والرزه ماتأكل عيش ياما ناس رازين احسن رزه بس للاسف الجيب فاضي ماعنده اللي يعبي سيارته بترول
طيب ايش الفايده من الرزه وجيبي فاضي واللي مايكد نفسه مافيه خير لنفسه ولبلاده لانه يبي كل شي على الجاهز

واشكرج على مشاركتج

[بوغزلان_قطر]

فعلاً هالشي انا شايفه بعيني في محطة بالكويت , ونزلت انا عبيت السياره بالبترول ولما ييت بطلع لازم توقف عند كابينه واتنزل الدريشه ويقولك اهوه كم الحساب وتدفع وطريقه وايد منظمه لانه , اول شي بتقلل من العماله الوافده وشي ثاني بصير المواطن والمقيم يعتمد ع نفسه , وبتكون الطريقه اسرع لانه كل واحد بعبي ويبي يمشي بسرعه